5. běh wo němske dumperowe mišterstwa w Hórkach přewjedli
Snano sej Pawl Domš dźensa, dwaj dnjej po wulkim finalu, praji, zo by šerpatka rizika mjenje njedźelu w Hórkach wubědźowanskej taktice lěpje tyła. Zejičan měješe na pjatym běhu němskich dumperowych mišterstwow, kotryž bě zdobom finalny, mjenujcy nanajlěpše šansy, serijoweho dobyćerja Filipa Krala z Róžanta z dumperoweho tróna storčić.
Po sobotnym kwalifikaciskim běhu, kotryž hižo hódnoćachu, ležeštaj kontrahentaj jeničce sydom stoćinow rózno. Woběmaj bě so dźeń do finalneho běha pod swětłomjetakami perfektne koło poradźiło. Domš bě za nje 58,08 sekundow trjebał, Kral 58,01 sek. Wobručow na čarje njeběštaj so wobaj dótknyłoj. Tuž bě jasne, zo budźe zakónčaca jězba lětušich mišterstwow chětro napjata w stawiznach dumpersporta, wšako Róžeńčan cyłkowny klasement po štyrjoch běhach z jenož dwěmaj dypkomaj nawjedowaše.