Wšitcy tuchwilu začuwamy, zo je nam něchtó přestawku nanuzował. Bydlenja, kotrež su poprawom naš schow, stawaja so z dźěłowym městnom. Město koncertow, hosćencow a dowola mamy so z partnerom abo swójbnymi na swój dom abo bydlenje wobmjezować.

Zo čas doma derje přetrajemy, móžemy so tež po aziskej wučbje fēngshuĭ měć. Před wjac hač 2 500 lětami hižo bu w Chinje harmonija mjez čłowjekom a wokolinu spěchowana. Kaž z naprašowanjow wuchadźa, zaběra so w tuchwilnej koronakrizy dźeń a wjac ludźi ze starodawnej wučbu wo harmoniji. To wšak njezadźiwa, přetož fēngshuĭ spožča žiwjensku energiju, kotraž naše wosobinske derjeměće spěchuje. A woboje drje nětko wosebje trjebamy. Někotre pokiwy móhli sej tuž k wutrobje wzać.

1Wěko nuznika ma po wužiwanju začinjene być. Tak mjenowany „chi“ so hewak do wody a dale do kanalizacije dóstanje a ći žiwjensku energiju rubi. Ze zelenymi rostlinami w kupjeli móžemy sej energijowy stopjeń powyšić.