W prózdninach komponować

pjatk, 22. septembera 2017 spisane wot:
Budyšin (SN). W nazymskich prózdninach maja młodostni wot 14 lět móžnosć, w tydźenskim kursu zakłady komponowanja nawuknyć. Wšitcy, kotřiž chcychu přeco hižo raz muzikaliske ideje zwoprawdźić, njech tule składnosć wužija. Wobdźělnicy nawuknu, kak melodiju na papjeru přinjesu a kak teksty zhudźbnja. Nazhonity komponist Jan Cyž jich při tym podpěra. Wobdźělnicy měli noty znać. Tež wobknježenje instrumenta znajmjeńša na zakładnym niwowje je radźomne. Wobdźělenje na wosobu płaći 50 eurow. Kursy wotměja so wot 9. do 13. oktobra w Budyskim Serbskim ludowym ansamblu stajnje wot 9 do 12 hodź. a wot 23. do 27. oktobra w Choćebuskej Academy of Music, tohorunja stajnje wot 9 do 12 hodź. Zajimcy njech přizjewja so w dorostowym studiju SLA pod telefonowym čisłom 03591/358 110 abo e-mailnje pod .

Mjezynarodny swjedźeń hudźby

štwórtk, 21. septembera 2017 spisane wot:

Budyšin (SN). Něhdźe 800 wuměłcow z pjeć krajow wuhotuje we wobłuku 13. mjezynarodneho dujerskeho swjedźenja wot jutřišeho hač do njedźele dohromady 30 koncertow w Budyšinje a na wjacorych městnach wokrjesa. Před 26 lětami wot spěchowanskeho kruha Budyskeho młodźinskeho dujerskeho orchestra do žiwjenja zwołany je so Mjezynarodny swjedźeń hudźby w měsće a wokrjesu z rjanej tradiciju stał. Štóž rady na dujersku hudźbu w klasiskej, ale tež modernej formje słucha, njeměł tule składnosć skomdźić.

Radźićeljo so schadźuja

srjeda, 13. septembera 2017 spisane wot:

Róžant. Prěnja změna wujasnjenskich wustawkow za Šunow budźe jedna z temow přichodneho posedźenja gmejnskeje rady Ralbicy-Róžant jutře, štwórk, we 18.30 hodź. w sydarni Róžeńčanskeje wjesneje rady. Nimo toho porěča radźićeljo wo dodatnych wustawkach „Róžant – Při studničce“ a schwala hospodarski plan za lěto 2017.

Njebjelčicy. Tohorunja jutře, ale hakle w 19.30 hodź. schadźuja so čłonojo gmejnskeje rady Njebjelčicy w tamnišej sydarni. Nimo někotrych twarskich naležnosćow w Pěskecach, Serbskich Pazlicach a Miłoćicach rozjimaja radźićeljo mjez druhim podružne zrěčenje mjez towarstwom Kamjenjak a Njebjelčanskej gmejnu. Wobě zhromadźiznje stej zjawnej, wobydlerjo su tuž přeprošeni.

W Delanach zaso swjeća

srjeda, 06. septembera 2017 spisane wot:
Ralbicy. Z natočenjom piwa započnje so zajutřišim, pjatk, lětuše delanske babylěćo, kaž Ralbičenjo swój wjesny swjedźeń mjenuja. W 20 hodź. wubědźuja so wohnjowi wobornicy pod swě­tłomjetakami, přizamknu so reje z diskoteku Melodia. Po ludobulowym turněrje sobotu wot 14 hodź. pokazaja wjesnjenjo w 20 hodź. swój zabawny program. Přizamknu so reje­ z Dr. Taste. Njedźelu wot 10 hodź. su wšitcy na rańše piwko přeprošeni. W 13.30 hodź. budźe pokazka konjaceho sporta a wot 15 hodź. kulturny program z kofejom za rentnarjow. W 16 hodź. předstaji sokolnik swoje dźěło a swoje ptaki, we 18 hodź. wuhódnoća tombolu, kotrejež prěnje myto je 700 eurow hódne koleso. W 19 hodź. pokazaja hišće raz film widejokružka, prjedy hač babylěćo z bjesadu w stanje wuklinči. Wšitke dny budźe wo ćělne derjeměće postarane a zastup darmotny. Ralbičanska wjesna rada wjeseli so na prawje wjele wopy­towarjow.

Žnjenc a požnjenc stej tradicionelnje měsacaj žnjenskich nałožkow w Hornjej kaž Delnjej Łužicy. Wosebje w Delnjej Łužicy je łapanje kokota rozšěrjene. Minjene tydźenje su jón na wjacorych wsach pěstowali, kaž tule w Strobicach. Jutře, sobotu, přeproše­ja mjez druhim w Mosće, Rogoznje a Popojcach na tónle nałožk, a to na wšěch třoch mětsnach wot 14 hodź. Foto: Michael Helbig

Wólbna protyka (24.08.17)

štwórtk, 24. awgusta 2017 spisane wot:

Přeprošatej na rozmołwu

Budyšin. Načolna kandidatka Lěwicy Katja Kipping a direktna kandidatka strony za wólby Němskeho zwjazkoweho sejma we wólbnym wokrjesu Budyšin I Caren Lay přeprošatej wobydlerjow jutře, pjatk, wot 17.30 do 19 hodź. na wosobinsku rozmołwu na swoje čerwjene křesło, kotrež budźe na Budyskich Žitnych wikach stać. Tam změja zajimcy składnosć, wo politiskich temach so rozmołwjeć a so wo zaměrach Lěwicy wobhonić.

Serbski spisowaćel Beno Budar (srjedźa sedźo) a předsyda zwjazka přełožowarjow Kazachskeje Kajrat Bagbergenow (5. wotlěwa) staj wčera w Chrósćicach na Jurja Chěžku spominali. Wonaj zbližištaj 3. a 4. lětnikej tamnišeje zakładneje šule, kotraž ma mjeno Chěžki, žiwjenje a skutkowanje serbskeho poeta. Bagbergenow chcyše na Swjedźeń serbskeje poezije přijěć. Swjatk, kotryž měješe­ Jurjej Chěžce wěnowany być, pak bě wupadnył. Tuž je priwatnje přijěł a dźěćom přednošował. Foto: Ludmila Budarjowa

Z parkowej železnicu pućować móža zajimcy­­ tež tónle kónc tydźenja zaso w Cho­ćebuzu. Wosebitu składnosć z parnej lokomotiwu na cyłkownje 3,2 kilometraj dołhej čarje z lokomotiwnikom Christianom Menzelom sobu jěć, su mnozy železniscy romantikarjo minjeny kónc tydźenja wužili. Železnica hišće hač do spočatka septembra wšědnje hosći wočakuje. Foto: Michael Helbig

K zakónčenju 15. chóroweho a instrumentalneho tydźenja w Domje biskopa Bena w Smochćicach předstaji něhdźe 70 wobdźělnikow z cyłeje Němskeje wuslědki swojeho dźěła, a to jutře, sobotu. Koncert pod hesłom „Italska chórowa hudźba“ wotměje so w 19.30 hodź. w cyrkwi swj. Bena. Zastup je darmotny, wo pjenježny dar so prosy. Foto: SN/Maćij Bulank

Twarnišćow je w Budyšinje tuchwilu dosć a nadosć, byrnjež Móst měra za wobchad zaso swobodny był. Tak přihotowachu sobudźěłaćerjo Klukšanskeho recyclingoweho zawoda tele dny wšitko za to, spotorhać byrgarske domy na Hasy při Młynskich wrotach. Za čas wottorhanskich dźěłow je přistup k pokładni Serbskeho ludoweho ansambla z Hasy při Młynskich wrotach wěstotnych přičin dla zaraćeny. Tola přez dwór SLA zajimcy puć ke kasy zawěsće tež namakaja. Foto: SN/Maćij Bulank

nawěšk

SERBSKE NOWINY podpěruja:

fueorg misain karten sorbisch

nowostki LND