Berlin/Budyšin (SN/JaW). Zawjazki Eu­rop­skeje charty regionalnych a mjeńšinowych rěčow zwoprawdźić je přede­wšěm nadawk zwjazkowych krajow a jenož w małym wobjimje tež Zwjazka. ­Takle wotmołwi prezident Němskeho zwjazkoweho sejma Wolfgang Schäuble na prašenje zapósłanca Zelenych w zwjazkowym sejmje Stephana Kühna, internetny portal sejma tež w rěčach w Němskej připóznatych narodnych mjeńšin spřistupnić. Zdobom prosy Schäuble wo zrozumjenje, zo je „chětro naročne, webstrony we wosomnaće rěčach na aktualnym stawje dźeržeć“. Strony sejma „nimaja so po reprezentatiwnosći w Němskej nałožowanych rěčow, ale měrja so na zrozumliwosć informacijow“, kaž prezident zwjazkoweho sejma podšmórny.