„Video Killed the Radio Star“, fifoleše britiske duwo The Buggles w lěće 1979 a zahaji z tym dobu hudźbneho widejoweho klipa. Zynki a wobrazy ze sobu zwjazać, bě drje hižo do toho z wašnjom – wobmjezujemy-li so na europske stawizny, saha tale tradicija wróćo hač do antikskeje Grjekskeje –, ale ze spočatkom 1980tych lět nastupichu poněčim dźeń a wjac spartowych telewizijnych sćelakow, posrědkowace raz mjenje, raz bóle radźene krótkofilmčki na wobrazowki po wšěm swěće. Cyle tak, kaž tule dobu zahajacy mjenowany spěw wěšćeše, wšak přiwšěm přišło njeje – tež dźensa hišće słyšimy zwjetša jenož krótki čas relewantne štučki na njeličomnych rozhłosowych žołmach; a sćelaki, kaž MTV, VH1 abo VIVA, su mjeztym (zaso) nišowe formaty, kotrež – jelizo docyła hišće eksistuja – wjetšinu programa ze wšěm móžnym wuhotuja, při čimž hudźbu skerje zlutniwje wobkedźbuja. Přiwšěm je wulka doba hudźbneje telewizije tomu přinošowała, zo sta so zwobraznjenje popowych titulow ze swójskej wuměłskej formu.