Łužiske liški Běła Woda – Lawy Bad Tölz 3:2 po třělenju penaltyjow (0:0, 1:1, 1:1, 1:0)
Po kanterowym dobyću 6:0 w poslednjej hrě 2020 chcychu chowancy lodohokejoweho trenarja Coreyja Neilsona w prěnim duelu noweho lěta doma w Běłowodźanskej liščej jamje znowa dobyć. Lawy z Bad Tölza běchu do Hornjeje Łužicy z jeno 13 pólnymi hrajerjemi přijěli, najebać to pak dźeržachu přez cyłu partiju wulku spěšnosć, tak zo mějachu Liški swoje ćeže.
Traješe trochu, prjed hač so duel tak prawje započa. Wobě mustwje daštej puk w swojich rjadach běžeć, bjez toho zo bychu před wrotami strašni byli. Domjacy móhli w prěnjej třećinje hnydom trójce w powerplayju nawjedowanje docpěć, Bayerscy lodohokejisća hrajachu jónu z mužom wjac. Wobaj wrotarjej pak staj wšitke móžnosće znješkódniłoj.