Praha (ČŽ/K/SN). Sewjeroatlantiska alianca NATO trjeba zasadnu reformu. Tutu konkluziju sćěhuje čěski prezident Miloš Zeman dźiwajo na podawki w Afghanistanje. W rozmołwje z nowinu Blesk wón zdobom zwurazni, zo dyrbjała NATO přestać posłužbowa organizacija USA być a měła město toho praktikować runoprawosć mjez jeje čłonami. NATO by tež měła swojeho njepřećela konkretnje definować. W tym zwisku Miloš Zeman rjekny, zo je wón samsneho měnjenja kaž francoski prezident Emmanuel Macron, zo njeje Ruska njepřećel NATO, ale zo je to mjezynarodny terorizm. Wojersku prezencu w Afghanistanje nahle skónčić a talibanam tak zdobyće mocy zmóžnić, je po přeswědčenju Zemana zmylk bywšeho ameriskeho prezidenta Donalda Trumpa a jeho naslědnika Joewa Bidena. „Hdyž je to­ była njekoordinowana akcija Ame­ričanow, dyrbi prašenje być, hač njetrjeba NATO reformu.“ Zeman wotpokaza tež Bide­nowy nahlad, zo „Američenjo njeměli wojować a mrěć we wójnje, w kotrejž Afgha­nojo sami nochcedźa wojować“. Taliban je teroristiska organizacija, kotraž chce swět wobknježić.