Chróšćanscy wosadni fararjo so w běhu lět zaměrnje wo zachowanje Božeho domu starali

Spěwajo kěrluš „Ta cyrkej je dom Boži nam, tu Bóh nas zhromadźuje ...“ dopominaja so Chróšćanscy kemšerjo na swojich prjedownikow, kotřiž běchu w lětach 1769 do 1771 cyrkej w baroknym stilu, kajkaž tam dźensa steji, natwarili. Přichodnu srjedu budźe tomu 250 lět, zo poswjeći biskop Jakub Józef Wóski krótko do swojeje smjerće nowy Boži dom, kotryž bě a wosta kruty stołp narodneho a nabožneho byća.

Twarske dźěła w běhu lět

Z fararjom bě w Chrósćicach hač do lěta 1791 w Róžeńće rodźeny Jurij Cyž. W jeho naslědnistwje staraše so 13 fararjow – najdlěje, a to 47 lět wot 1834, Jakub Bart – nimo swojich duchownych nadawkow wo to, twarsku substancu wosadneje cyrkwje zachować. Jich zamołwita próca a zdokonjane dźěła, naličene w farskej chronice, njemóžeš wysoko dosć hódnoćić. Tak bě fararja Cyžowa zasłužba, zo dósta cyrkej dwě lěće po tym zo bu natwarjena, nowe pišćele. Tři lěta pozdźišo poswjeći tam tachant Měrćin Nuk nowej wołtarjej.