Pěstowarske a hortowe dźěći Male­šan­skeje Witaj-pěstowarnje „K wód­nemu mužej“ podachu so před něšto časom na pućowanje po slědach „sydom serb­skich kralow“. Woni běchu při wul­kej bit­­wje na horje Lubin pola Bělšec zahinyli.

Kubłarka knjeni Judit Heroldowa je we wobłuku sakskeho fondsa „Čiń sobu!“ mysličku zapodała, sydom kralow jako kamjentne figury zhotowić a jich tak wožiwić. A za to dósta pjenježne myto. Tak móžeše wuměłc a kamjenje­­ćesar Markus Herold kamjenje kupić a z nich kralow wu­dypać. Nětko debja woni jako postawy pućowan­sku šćežku podłu hory Lubin.