Ličba kradnjenjow a zadobywanjow w pomjeznej kónčinje dale wulka
Žitawa/Zhorjelc (dpa/SN). Wobydlerjo Žitawy su znjeměrnjeni: Stajnje zaso jewi so mjeno města w třikrajowym róžku k Pólskej a Čěskej w policajskich rozprawach nastupajo padustwa a zadobywanja do bydlenjow. W socialnych syćach naležnje wo tym diskutuja, nic bjez přičiny. Po kriminalnej statistice je jeničce ličba kradnjenych jězdźidłow wot lěta 2019 do 2020 wo 76 procentow rozrostła.
Tež Žitawski wyši měšćanosta Thomas Zenker (njestronjan) ličby znaje. Hižo nalěto žadaše sej wón po wozjewjenju policajskeje statistiki wot sakskeho nutřkowneho ministerstwa wotpowědne naprawy. Wón so za to zasadźa, jednanje k instalaciji stražnych kamerow na najwažnišich čarach w Žitawskej kónčinje pospěšić. Srědki za to měli w etaće kraja zaplanowane być. „Smy w pomjeznym regionje. Tu je kriminalita wjetša hač wosrjedź kraja. Wjesnjanosća w hórskich kónčinach su runje tak alarmowani kaž předewzaćeljo“, wón wuzběhnje.