Benedikt Dyrlich: Njetrjebamy žanu nowu wójnu mjez Słowjanami
Budyšin (dpa/SN). Nadpad knjejstwa Putina na Ukrainu je žadławy a njewodajomny. Njetrjebamy žanu nowu wójnu mjez Słowjanami, piše basnik Benedikt Dyrlich. „Starosću so wo Ukrainu z jeje bohatej literaturu a kulturu. Wosebje so starosću wo přećelow, wo literaturu tworjace koleginy a kolegow w Lwowje, Kijewje, Černohiwje, Winiziji a druhdźe. Wjacore basnjerki a wjacori basnicy z Ukrainy wobohaćichu w minjenych lětach a lětdźesatkach naše mjezynarodne swjedźenje serbskeje poezije. Čuju so z nimi runje nětko solidarny kaž docyła z jich njewotwisnej a mnohorěčnej domiznu. To sym dźensa rano tež wosobinsce zwuraznił napřećo Tetjani a Serhijej Dzjuba, wuznamnej basnjerce a wuznamnemu basnikej z Černohiwa, kotrajž běštaj hižo wjacekróć hosćej na literarnych zetkanjach we Łužicy.“
