Na něhdyšej šuli w Rakojdach maja nětko kopiju nimale 150 lět stareje dwurěčneje tafle

Serbske wěnowanje twarca Pětra Simona z Lětonja, zapołožene do kasety, kiž bě za pěskowcowej taflu zamurjowana:

Staj Twoju nadźiju a dowěrjenje na Boha twojeho Knjeza!

Wašu šulu wobarnuj,

žohnuj wašich dźěći dźěło,

štož so wuči, požohnuj,

zo by wěčny wužitk měło,

wobdar wašoh wučerja,

z Božim duchom z wysoka.

Peter Simon z Lětonja

Bibliskej hronje „Bojosć teho Knjeza je spočatk mudrosće.“ (psalm 111,10) a „Lasset die Kindlein zu mir kommen und wehret ihnen nicht, denn solcher ist das Reich Gottes.“ (Mat 19,14) stejitej nětko zaso nad zachodom bywšeje šule w Rakojdach pola Barta. Dwuposchodowy dom (dźensa Rakojdźanska wjesna dróha 42) pochadźa z lěta 1878. Hižo dawno je šula z njeho wućahnyła, na čož so twarjenje do dźensnišeho jako bydlenski dom wužiwa. Zo běštej nad jeho zachodom něhdy serbske a němske hrono čitać, nichtó hižo njepomni. Lětsa, 6. awgusta, stej so nimale połdra lětstotka starej napismje na dom wróćiłoj.

Šulski twar z lěta 1878