Zwony Budyskeje Michałskeje cyrkwje wozjewjeja hodowne poselstwo

W lěće 1619 załoži město Budyšin Michałsku wosadu za ewangelskich Serbow wokolnych wsow. Hač do 1836 bě cyrkwinske žiwjenje w njej ryzy serbske, wot teho časa je dwurěčne. Wo tym swědča mjez druhim tři zwony na cyrkwinej wěži, kotrež ze swojim zynkom hižo 130 lět hodowne poselstwo w serbskej a němskej rěči po kraju šěrja.

Stare Michałske zwony

Po tym zo bě so Budyšin w Třicećilětnej wójnje wotpalił, da měšćanska rada za Michałsku cyrkej 1666 w Drježdźanach nowy zwón leć. Z němskim napisom bě wón wěnowany „der evangelischen wendischen Gemeinde bei der Kirche S. Michaelis“. Dlěje hač połdra lětstotka wosta tutón zwón jenički na cyrkwinej wěži. W lěće 1819 měješe česć, 200. wosadny jubilej z cyłohodźinskim zwonjenjom zahajić a zakónčić.

Hakle 1829 dósta cyrkej tři zwony. Wjetšej wotkupi Michałska trjebanej měšćanskej Pětrskej wosadźe. Přidatnje da sej w Gruhlec lijerni w Małym Wjelkowje hišće mały zwón leć. Tute tři, z napisami we łaćonskej a w němskej rěči wuhotowane zwony słužachu wosadźe hač do lěta 1892.