Mjez darićelemi z Łužicy su štyri serbske towarstwa

Za wopomnišćo w lěće 2021 zemrěteho dr. Geralda Stona je Maćica Serbska w decembru přepokazała 1 070 eurow do Oxforda. Tutu sumu bě zjawna zběrka w Serbach (hlej namołwa w SN 26. julija 2022) w spominanju na wuznamneho jendźelskeho slawista a wuskeho přećela Serbow wunjesła. Pjenjezy darili su šesćo priwatnicy a štyri towarstwa: Maćica Serbska, Přećeljo Smolerjec kniharnje, Serbske ewangelske towarstwo a Towarstwo za spěchowanje serbskeje rěče w cyrkwi.

Twarske dźěła lětsa přewjedu

Wopomnišćo ma nastać w bibliotece Hertford Collega Oxfordskeje uniwersity, na kotrymž je Gerald Stone wot 1972 do 1999 jako docent slawistiki skutkował. We wotdźělu knihownje za moderne rěče ma so zarjadować wosebity wotdźěl, w kotrymž chowaja so jeho wozjewjenja kaž tež dalše publikacije wo serbskich temach, kiž su předewšěm w jendźelskorěčnych krajach wušli. Tež wotpowědna tafla ma tam na počesćeneho dopominać a hłownych darićelow mjenować. Po wotzamknjenju planowanskeje fazy chcedźa twarske dźěła w bibliotece w běhu lěta 2023 přewjesć.