Wojerecy (AK/SN). 44lětny farar Daniel Schmidt z Rózborka je nowy superintendent Ewangelskeho cyrkwinskeho wo­krjesa šleska Hornja Łužica. Na sobotnym posedźenju synody, kotraž schadźowaše so lětsa na Wojerowskim ewangelskim gymnaziju Johanneumje, hłosowaše přemóžaca wjetšina synodalow za njeho. Wón naslěduje 65lětneho superintendenta dr. Thomasa Koppehla, kotryž so po 16 lětach zastojnstwa na wuměnk poda. Spěwarjo ukrainskeho chóra „A Capella Ensemble“ z Kijewa a Odessy su dźeń hudźbnje přewodźeli. Woni zanjesechu spěwy ze swjateje liturgije Jana Chrysostomosa. Hnydom na spočatku zarjadowanja spomi­nachu wobdźělnicy na dweju njeboheju zasłužbneju synodalow: Třižonjana Gottharda Kowarka – wjele lět aktiwneho we Łazowskej wosadnej cyrkwinskej radźe, kaž tež krajneho radu a prezesa wo­krjesneje synody, Dubčana Ericha ­Schulzu.