Na Serbskim ewangelskim cyrkwinskim dnju sej zetkawanja waža

Slepo (AK/SN). Ewangelscy Serbja su łužiski pokład wěry. Woni měli sej zhromadnje Bože słowo kaž tež spěwanje a modlenje w swojej maćeršćinje wobchować. To běše poselstwo 77. serbskeho ewangelskeho cyrkwinskeho dnja minjeny kónc tydźenja w Slepjanskej wosadźe. „Bóh konflikty a rozestajenja mjez nami čłowjekami widźi, wón pak widźi ju w lubosći. Widźaca lubosć k pomocy wjedźe“, podšmórny Jan Malink, serbski superintendent na wuměnku, w swojim prědowanju wčera w swjedźenskej bohosłužbje. Tam je so wón hłubšo z Ochranowskim lětnim hesłom „Ty sy Bóh, kiž mje widźi“ zaběrał.