Wo wčerawšej premjerje lětušich 10. Krabatowych swjedźenskich hrow

Čorny Chołmc (JK/SN). Jubilejne, dźesate předstajenje stawiznow ze žiwjenja Jana Šadowica, alias Krabata, je wčera wječor w Čornym Chołmcu swoju premjeru dožiwiło. Je to poslednje z druheho cyklusa, a tak njezadźiwa tež titul „Posledni woheń“. Wćipni njeběchu tuž jenož ći zbožowni, kotřiž móžachu sej wobstarać jednu z požadanych kartkow za cyłkownje 15 předstajenjow, ale tež powołanscy a lajscy dźiwadźelnicy sami.

Wupruwowane mustwo wokoło hłowneho zamołwiteho inscenacije Alexandera Siebecke je z podpěru Čornochołmčanskeho wjesneho a Krabatoweho towarstwa něšto na noze stajiło, štož pyta swojeho runjeća w regionje. Třihodźinske předstajenje njebě w žanym wokomiku wostudłe, ale skerje wužada sej połnu koncentraciju, zo njebychu přihladowarjo ničo z naročnych dialogow abo rěčow jednanja skomdźili.