Pjaty raz organizuje Turistiske towarstwo Budyšin staroměšćanski festiwal „Woda – wuměłstwo – swěca“. Prěni septemberski kónc tydźenja sta so historiske žro sprjewineho města wospjet z jewišćom resp. hrajnišćom najwšelakorišich zarjadowanjow a poskitkow.

Budyšin (SN/bn). Dohromady je něhdźe sto towarstwow, iniciatiwow a jednotliwcow čestnohamtsce do wuhotowanja festiwala zapřijatych. „To je cyłkownje wjace hač 450 akterow, pochadźacych přewažnje z Budyšina a wokoliny, z čimž podpěramy a spěchujemy angažement nastupajo regionalne wuměłstwo a tudyšu kulturu“, w medijowej zdźělence festiwal organizowaceho towarstwa rěka.