Impresije ze Šotiskeje: Z kupy Islay móžeš so na přewšo powabne wašnje do metropole Glasgowa dóstać(2)
Jězor Loch Finlaggan na sewjerowuchodźe kupy Islay je wuznamna městnosć w šotiskich stawiznach. Na jeho kupje Eilean Mòr su powostanki hrodu Finlaggan/Eilean Mòr Castle. Wobtwjerdźeny dom běše něhdy rezidenca a twjerdźizna lordow kupow (Lords ot the Isles) a Clana MacDonald. Jich korjenje sahaja wróćo hač do 12. lětstotka, wučitaš sej z rodopisa. Tón njeje jenož w małym, čestnohamtsce dohladowanym wopytowarskim centrumje přistupny, ale mjeztym tež w interneće. Areal je nimale dwaj kilometraj wot hłowneje dróhi zdaleny. Staw małeje dróhi wuwědomja, zo tu wulke turistiske prudy po puću njejsu. Něšto awtow na parkowanišću před wopytowarskim centrumom wo tym pak swědči, zo so ludźo za mystisku městnosć tola zajimuja. Po wuskej, wuteptanej šćežce podłu pastwy ze stadleškom wowcow z impozantnym boranom dóńdźeš na kupu z powostankami hrodu. Funkcije jednotliwych twarjenjow su wopisane.
