Za Worklecy hrajachu: Beno, Jakub a Jan Bobka, Marko Brězan, Ludwig Eckert, Stefan Gedik, Elias Kummer, Marcel Rjelka, Jan Zarjeńk, Józef Šnajder, Daniel Wałda a Sćěpan Wjeńka
We Worklečanskej sportowni bě wšitko spřihotowane za wulkotny wolejbulowy swjedźeń k sezonowemu wuklinčenju sakskeje klasy. Nimale sto přihladowarjow tworješe krasnu kulisu na tribunje. Tući dachu so wot dobreje nalady sportoweho DJa Romana Hainka zabawjeć a pohonjować. Nalada w mustwje běše dosć dobra, wšako su sej Worklečenjo z wonkownym dobytym dypkom w Pirnje hižo městno w tabulce skrućili.
ST Viktoria Worklecy –
Volleys Koblicy 3:1
(25:22, 25:19, 26:28, 25:20)
Domjacy chcychu z dobyćom přećiwo tabulkowemu susodej Koblicy pokazać, zo słušeja ze swojim wukonom na kóždy pad do sakskeje klasy. Z tutej motiwaciju dźěše mustwo na parket a wojowaše wo kóždy bul. Při stawje 19:14 zdaše so předskok wěsty, tola Kobličenjo móžachu zastatk hišće raz na 23:22 skrótšić, prjed hač poslednej nadaći Worklečanskeho kapitana Ludwiga Eckerta k dobyću sadźby wjedźeštej.