Sakski krajny biskop Tobias Bilz sej chwile za serbske naležnosće brał

Budyšin/Hodźij (SN/at). Serbski wosadny zwjazk a Serbske ewangelske towarstwo so w skutkowanju za wěriwych wudospołnjatej. Wobraz za to móhłoj dwójnej wěži Hodźijskeje cyrkwje być, měnješe krajny biskop Ewangelsko-lutherskeje krajneje cyrkwje Sakskeje (EVLKS), Tobias Bilz, sobotu po puću do Božeho domu. Tón chcyše sej po zetkanju ze zastupjerjemi wobeju cyłkow hišće wobhladać.