Na mejemjetanje do Bukec
Bukecy. Bukečanska Bjesada a kulturu spěchowace towarstwo Bukecy přeprošujetej jutře, sobotu, wot 15 hodź. na mejemjetanje na wulkim parkowanišću blisko B6. Po tym sćěhuje program z Bukečanskej drastowej skupinu a wosadnymi dujerjemi. Přihotowane je tež program za swójby w „Bukečanskej Hospodźe“. Wo hudźbne wobrubjenje postara so serbska band Logarytmus.
Kino a spěwanje w Chrósćicach
Chrósćicy. Chróšćanska młodźina přeprošuje hižo dźensa dźěći wot 18.30 hodź. do Chróšćanskeho kluba na dźěćace kino. Wot 20.30 hodź. chcedźa zhromadnje spěwać. Sobotu w 16 hodź. potom meju mjetaja. Po tym přeproša na wjesny swjedźeń při klubje z kofejom a tykancom. Za dźěći stej skakanski hród a tombola přihotowanej. Wot 20.30 hodź zahraje skupina Holaski k rejam. Samsny dźeń tež we Wotrowje (16 hodź.) a w Němcach (17 hodź.) meju mjetaja.
Program pěstowarnje pod meju
Radwor. Radworski młodźinski klub přeprošuje wšitkich zajimcow na swoje mejemjetanje, kotrež zarjaduje njedźelu, 12. meje, na Radworskej nawsy. Započatk je w 15 hodź. z programom katolskeje pěstowarnje.
