Załožbowa rada: Syman Pětr Cyž jako jednaćel LND hač do 2030 wobkrućeny

Choćebuz (SN/mb). Najwažniše wobzamknjenje załožboweje rady je Jan Budar, direktor Załožby za serbski lud, medijam na nowinskej konferency po wuradźowanju gremija jako prěnje zdźělił: Zrěčenje z jednaćelom Ludoweho nakładnistwa Domowina (LND), Symanom Pětrom Cyžom, su wo dalšich pjeć lět hač do 2030 podlěšili. Prěnja doba zastojnstwa so klětu kónc meje skónči. Do toho je Cyž koncept za wuwiće LND hač do 2029 předstajił, kotryž je zhromadnje z wotrjadami zawoda wudźěłał. Nimo toho su radźićeljo wšelake rozprawy – mjez druhim zawodneje rady a přirady LND – wo situaciji w nakładnistwje na wědomje brali. Jan Budar, kotryž wuslědki hromadźe z předsydu załožboweje rady, Markom Kowarjom, prezentowaše, zwěsći: „Nalada w zawodźe je lěpša hač před lětom, jednaćel je na prawym puću.“