Maximilian GruberSerbske Nowiny na Instagramje? Haj! Prawje sće to widźeli. Serbski wječornik je sej do dalokich morjow moderny zwažił. Prawje tak. Tež my jako serbski ludźik njeměli so wuwićam swěta wokoło nas zawěrać. Pola někotrych tute dopóznaće tróšku dlěje traje. Ale: Štož ma derje so radźić, wo tym měł so do toho wadźić. Diskusije a wotwažowanja běchu tež za Instagramowy kanal Serbskich Nowin trěbne. Što je wažniše: Dźěłowa móc za ćišćane wudaće, abo wjace wobsahow za młódši publikum? Wotmołwa na tute prašenje je po mojim měnjenju wočiwidna: Klasiski nowinski žurnalizm, kajkiž jón w Serbach hišće pěstujemy, je dołhodobnje bjez přichoda. Fokus leži tuž na medijach, kotrež tež młoda generacija wužiwa. Instagram je jedyn z nich, TikTok dalši. Wězo wobsteji kumšt nětko w tym, wšelakore zajimy přewšo šěrokeho Serbstwa wotbłyšćować. Přetož nimamy jenož młodych ludźi, kotřiž ćišćanu nowinu jenož jako připlack na blidźe staršeju čitaja. Tež na swěrnych našich čitarjow papjerjanych abo digitalnych nowinow nochcemy zabyć.