Nowina nastajenje Polakow ćěkancam napřećo přepytowała

Waršawa. Nastajenje Polakow ćěkancam napřećo je so minjeny čas změniło. To je wuslědk naprašowanja slědźerskeho instituta Opinia 24 w nadawku Gazety Wyborczeje. Nowina bě naprašowanje składnostnje wčerawšeho Mjezynarodneho dnja ćěkancow skazała a je wuslědki we wosebitej přiłoze wozjewiła.

Bjez runjeća bě pomocliwosć Polakow bjezposrědnje po nadpadźe Ruskeje na Ukrainu w februaru 2022. Wjetšina Polakow je hnydom pomhała. Dobrowólnicy, kotřiž ukrainskich ćěkancow w priwatnych awtach na mjezy wotewzachu a zastarachu, zbudźichu tehdy wšudźe wulke wobdźiwanje. Pólska přiwza 1,5 milionow ludźi, kotřiž před wójnu Ruskeje ćěkachu. 82 procentow Polakow njewidźeše žadyn strach, zo so nawal Ukrainjanow na pólsku rěč, kulturu a hajenje nałožkow špatnje wuskutkuje. To wšak je so změniło. Dźensa nochce 42 procentow ludźi scyła žanych ćěkancow w Pólskej wjace widźeć. 35 procentow jenož hišće ukrainskich ćěkancow akceptuje. Města su jim napřećo přichileniše hač wjesne kónčiny na wuchodźe kraja.