Flensburg (SN/mb). Składnostnje Europeady w hraničnych kónčinach Južneje a Sewjerneje Schleswigskeje w Němskej a Danskej je so tež Mjeńšinowa rada schadźowała. Zastupjerjo připóznatych domoródnych narodnych mjeńšin Němskeje su so w domje Danow w Flensburgu „Flensborghus“ zetkali respektiwnje so online wobdźělili – kaž předsyda Domowiny Dawid Statnik, kiž w Budyšinje dźěła.

Gremij je so štyrjom wulkim temam wěnował. Tak su poslednje namjety za planowane poručenje konferency kultusowych ministrow (KMK) za sposrědkowanje wědy na šulach wo narodnych mjeńšinach schwalili. W dźěłowej skupinje zastupjerjow mjeńšinow a zwjazkowych krajow, kotraž je naćisk zdźěłała, skutkuje tež referentka Domowiny za kubłanje, Katrin Suchec-Dźisławkowa. Kaž předsyda třěšneho zwjazka Dawid Statnik našemu wječornikej dźensa wobkrući, chce KMK poručenje hišće lětsa schwalić. Najebać to, zo zwjazkowe kraje wo konkretnym zwoprawdźenju same rozsudźeja, ma tajke zhromadne poručenje „wěstu politisku móc“, tak Dawid Statnik.