Statnik: Kandidaća stronow dźeń a husćišo w serbšćinje wabja

Budyšin (SN/mb). Jurij Bulank, serbski kandidat SPD w „serbskim wólbnym wokrjesu“ Budyšin 2, do kotrehož gmejny zarjadniskeho zwjazka „Při Klóšterskej wodźe“ słušeja, je jara zahe w socialnych syćach interneta serbsce komunikował – nic jenož z hesłami, ale z dlěšimi tekstami. Zo so za „wjac serbskich wučerjow“ zasadźuje, zhonja wolerjo nětko tež na serbskim wólbnym plakaće při puću. Kandidatka CDU Elaine Jenčec, kotraž so wo naslědnistwo amtěrowaceho serbskeho zapósłanca Alojsa Mikławška prócuje a serbsce wuknje, prezentuje wulkoplakat „za sylne čestne zastojnstwo a wěstotu w komunach“. Maria Untchowa, kandidatka Zelenych we wólbnym wokrjesu Budyšin 3, do kotrehož Kulow słuša, wabi ze swójskim serbskim lětakom; Hagen Domaška, kandidat strony we wólbnym wokrjesu Budyšin 4, w kotrymž Radwor je, ma dwurěčny plakat.