London (dpa/SN). Britiske knježerstwo chce nastupajo namócne wukročenja prawicarjow w kraju kruće postupować. Premierminister Keir Starmer po posedźenju krizoweho staba Cobra připowědźi, zo maja so fachowcy we wójsku ze specializowanym wukubłanjom na to nastajić, přećiwo krawalam zakročić. Nimo toho maja so w tym zwisku chłostanske jednanja pospěšić.

Po informacijach koordinowaceje instancy „National Police Chiefs Council“ zaja so wot spočatka randalow ty­dźenja cyłkownje 378 wosobow. Wjacori ludźo su hižo wobskorženi a w přepytowanskej jatbje. Přičina namócnych roze­stajenjow je ataka na rejowanski kurs w Southport blisko Liverpoola póndźelu tydźenja, při kotrymž su tři holcy zemrěli. Dalše wosom dźěći kaž tež dwě dorosćenej wosobje je zranjenych. W interneće su so wopačne powěsće rozšěrili, po kotrychž je skućićel požadar azyla z muslimskim mjenom. Policija pak tomu znapřećiwja. Tak jedna so wo 17lětneho młodostneho Wulkobritaničana, kotrehož staršej pochadźataj z Ruandy.