Tule wuwzaćnje wažny tekst dwurěčnje dokumentujemy. Tak móžeće dokument tež za diskusije z politikarjemi wužiwać, kotřiž serbsce njemóža, a z nimi wo tym diskutować.

1. Art. 6 wotrězk 1 sada 2 sakskeje wustawy zaruča a škita prawo přisłušnikow serbskeho ludu na „hajenje a wuwiwanje jich zdźědźenje rěče, kultury a tradicijow, wosebje přez šule ...“

2. Spjelnjenje tutoho z wustawy wuchadźaceho nadawka njeje bjez skutkownych organizatoriskich naprawow předstajomne. To płaći tež a wosebje za zakładne šule jako baza za wšo rěčne wuwiće w přichodźe. Tute naprawy wobchować resp. je najprjedy hakle stworić je tuž z wustawy wuchadźacy zawjazk swobodneho stata.

3. Zasadna naležnosć za hajenje a wuwiwanje serbskeje rěče je, zo so dźěćom z wotpowědnymi rěčnymi wuměnjenjemi wša wučba w serbšćinje na maćernorěčnym niwowje podawa. Zdobom je ryzy serbski rjadowniski cyłk za tute dźěći wažny, zo bychu maćeršćinu w šuli tež zwonka wučby mjez sobu wužiwali a ju z tym dale skrućeli.