Njeznaći w putniskej cyrkwi wěcnu a emocionalnu škodu zawinili

Róžant (SN/BŠe). Njeznaći su so zawčerawšim do Róžeńčanskeje swjatnicy zadobyli, policija wčera popołdnju zdźěli. Najprjedy pokradnychu woni woporničku, kotraž je za swěčki postajena. W njej bě po trochowanju něhdźe 50 eurow. Pjenjezy paducham hišće njedosahachu a tak měrjachu so na historiski tabernakl, kotrež je po informacijach policije ze 17. lětstotka. Tabernakl je Budyski rězbar Georg Vater zhotowił. Tola z njeho njemóžachu drohotny keluch kradnyć, dokelž je z přidatnym trezorom zawěsćeny. Po prěnich trochowanjach wučinja wěcna škoda padustwa něhdźe 625 eurow. Zastojnicy w swjatnicy slědy zawěsćichu a pokazku zhotowichu. Kriminalna słužba Kamjenskeho policajskeho rewěra pad nětko přepytuje. Kaž rěčnica policije Anja Leuschner dźensa na naprašowanje wječornika zdźěli, přepytowanja dale běža. Tuchwilu pak njeje žanych nowych pokazkow.