Prezidij Domowiny namołwja, dalšemu wliwej AfD zadźěwać

Budyšin (SN/BŠe). Wólby w Sakskej su nimo, ale přiwšěm je wulki dźěl Serbow šokowany. Předewšěm wuslědk AfD jich starosća. „Wólbny wuslědk wotbłyšćuje pačenosć sakskeje ludnosće, nažel pak tež njespokojnosć ze Zwjazkowej politiku“, zwurazni direktor Załožby za serbski lud Jan Budar. „Na jednej stronje mje wjeseli, zo nima AfD wjetšinu a zo su SPD, Zeleni a Lěwica w nowym sejmje zastupjeni. Na tamnej stronje nuzuje wuslědk přichodne knježerstwo k wulkim kompromisam. Nadźijam so, zo zrosće koalicija, kiž starosće młodeje generacije chutnje bjerje a njehladajo na stronske ideologije zmužiće a konsekwentnje rozsudy do přichoda twori.“