Čiła diskusija na zarjadowanju z młodej wědomostnicu w Radworju

Radwor (SN/BŠe). Temy kołowokoło Radworskeje šule běchu a su aktualne. Tež knižne předstajenje na temu „Kulturelna wěstota w dwurěčnych gmejnach“ minjeny pjatk na Radworskim dwórnišću so k tomu hodźeše. Awtorka Karoline Brützel, bydlaca w Bonnje, je ćežišćo swojeho masterskeho dźěła na přikładźe Radworskeje šule z lěta 2005 přepytowała, hdźež je nimale k tomu dóšło, zo njeje so tam 5. lětnik zarjadował. Wusud Budyskeho wyšeho zarjadniskeho sudnistwa je tomu tehdy skónčnje zadźěwało.