Serbja so hotuja na kongres FUEN wot štwórtka blisko danskeje hranicy

Hüsem/Budyšin (SN/mb). „Rüm hart – klaar kiming“ (wulka wutroba, jasny wobzor), takle wita Ilse Johanna Christiansen postum delegatow kongresa FUEN do Hüsema (Husuma). W meji bě 70lětna předsydka rady Frizow sekcije sewjer nahle zemrěła. Na internetnej stronje najwjetšeho třěšneho zwjazka narodnych mjeńšin w Europje pak skedźbni wona składnostnje 75 lět wobstaća FUEN na to, zo słušeja Frizojo do załoženskich čłonow a zo je so kongres europskeje organizacije posledni raz lěta 1957 w domiznje Sewjernych Frizow wotměł, we Weesterlönj/Westerlandźe na Sylće.