Lisćinu požadarjow za serbsku radu Sakskeje wozjewili – z nowym kandidatom

Budyšin (SN/mb). Domowina je wčera lisćinu kandidatow za wólby noweje Rady za serbske naležnosće Sakskeje wozjewiła. Dotalni radźićeljo so znowa wo dowěru zwjazkoweho předsydstwa (ZP) požadaja, kotrež ma přichodny pjatk na swojim posedźenju w Slepom wo kandidatach tajnje wothłosować. To su: Marko Suchy, kiž běše w nachilacej so wólbnej periodźe předsyda gremija, Dawid Statnik, předsyda Domowiny, Julian Nyča, nawoda rěčneho kubłanja projekta ZARI w nošerstwje třěšneho zwjazka, a Diana Šołćina, nawodnica Serbskeje wyšeje šule Worklecy. Nyču je „Škit Budyšin“ namjetował, Statnika župa „Michał Hórnik“ Kamjenc, Sucheho Spěchowanski kruh za serbsku ludowu kulturu a Šołćinu Serbske šulske towarstwo. Za pjate městno ma Sakski zwjazk městow a wsow w mjenje serbskich gmejnow zastupjerja namjetować, to je tuchwilu Chróšćanski wjesnjanosta Marko Kliman.