Pólski ministerski prezident z krizowym stabom we Wrócławju

Waršawa. Stolica Pólskeje njeje tele ­dny Waršawa, ale Wrócław. Hižo cyły tydźeń přebywa tam ministerski prezident ­Donald Tusk z krizowym stabom knježerstwa, zo by so wosobinsce wo koordinaciju naprawow přećiwo wulkej wodźe starał. Wodnjo a w nocy pomocnicy zhromadnje z wojakami měchi z pěskom pjelnja, zo bychu delnjošleske město před přepławjenjom škitali. Pegel Wódry dźě je najwyši staw docpěł.

Wulka woda je w Pólskej hobersku zahubu zawiniła. Cyłkownje sydom ludźi přisadźi žiwjenje. Za tójšto zhubjenymi hišće pytaja. Wosebje ćežko potrjechena je juhozapadna kónčina Delnjeje Šleskeje. Tam běchu so wjacore nasypy podłu rěkow zwjezli, na čož woda města a wsy zapławi. Žołma je wšitko sobu storhnyła, štož bě jej na puću, awta, mosty a cyłe domy. Hladajo na surowu móc wody ­Donald Tusk wobydlerjow namołwi na zwěrjata njezabyć. Ludźo měli hródźe, konjency a kurjency wočinić kaž tež psy a kóčki na swobodu pušćić, zo njebychu so zatepili.