Financny zarjad chcyše našeho njeněmcowaceho awtora dokładnje přepruwować – to zbudźi inspiraciju za tutón přinošk

Běše rjana, słónčna a spodobna póndźela. Po swjatoku wuchodźowach so hišće chwilu po historiskim centrumje Budyšina. Rozmyslowach při tym wo přichodźe Serbstwa, swojej identiće a wo tym, kotry z Budyskich denerow sej pozdźišo k wječeri zesłodźeć dam. Přišedši domoj, pohladach najprjedy raz do póstoweho ­kašćika. Na jeho dnje ležeše dopis, na wobalce steješe nadpismo „Finanzamt Bautzen“. Wulkotnje! Nětko skónčnje swoje dawki wróćo dóstanu a srědki za hišće wjace kebabow změju. Wjeselo bě wšak naiwne a dočasne. W lisće pisachu, zo chce finančny zarjad moju dźěławosć w Němskej dokładnje přepytować a zo dyrbju kónc měsaca wšě trěbne podłožki za to předpołožić. W mojich nutrinach nadobo prastara słowjanska njedowěra přećiwo statej wubuchny – před wočomaj steješe mi hižo wobraz Kryštofa kročaceho w rjećazach do Budyskeho jastwa.