Kongres FUEN pomina sej naležnosće narodnych mjeńšin bóle zapřijeć

Hüsem/Husum (SN/at). Na 75lětne skutkowanje zhladować a směrodajne nadawki do přichoda sformulować, to bě nadawk lětušeho kongresa Federalistiskeje unije europskich narodnosćow (FUEN), kotryž skónči so sobotu w Hüsemje.

W swojim witanju friziski wiceprezident FUEN Bahne Bahnsen wuzběhny, zo je politiske wobdźělenje rjap fungowaceje demokratije. Tež mjeńšiny měli so aktiwnje na politiskim a towaršnostnym žiwjenju wobdźělić. Prezidentka Krajneho sejma Schleswigsko-Holsteinskeje, Kristina Herbst, mjenowaše škit čłowjeskich a mjeńšinowych prawow a připóznaće mnohotnosće „stołpy, na kotrychž so moderna Europa natwari“.

Zapósłancaj zwjazkoweho sejma Stefan Seidler (SSW) a Denise Loop (Zeleni) wobžarowaštaj z widom na aktualne budgetne połoženje w Němskej, zo chce knježerstwo tež pola mjeńšin lutować. „Přez frakcije hižo wo tym rěčimy, kak móžemy to zaso cofnyć“, rjekny Loop.