Budyšin (SN/at). Prěnja młodźinska edicija z hišće młodeho nakładnistwa Veles z Lipska měješe swoju knižnu premjeru wčera w Smolerjec kniharni w Budyšinje. „Znowa namakany přećel“ je nowela Freda Uhlmanna, kotraž je pod originalnym titlom „Reunion“ w lěće 1971 wušła.

Sposrědkowar je poručił knižku w serbskej rěči wozjewić, powědaše wudawaćelka Lubina Hajdukowa wćipnemu publikumej a připowědźi zdobom „knihu połnu potajnstwow“. W srjedźišću steji přećelstwo Hansa Schwarza, syna židowskeho lěkarja a 16lětneho šulerja humanistiskeho gymnazija w Stuttgarće, z nowym šulerjom Konradinom hrabju von Hohenfels w 1930tych lětach minjeneho lětstotka. „Tema je cyle aktualna“, wudawaćelka podšmórny. Wudani so, tež před lětami wudawane knihi na jich aktualitu za přitomnosć přepruwować.