Lědma něchtó je tajke mnohostronske dźěło w redakciji zdokonjał kaž wón – rozmołwa na proze na wuměnk

Axel Arlt, naměstnik šefredaktora Serbskich Nowin, poda so po štyrjoch lětdźesatkach dźěła w redakciji kónc septembra na wuměnk. Kak najnazhonićiši žurnalist našeho wječornika do zańdźenosće, na aktualne nowinarstwo a do přichoda hlada, je w rozmołwje z Marcelom Braumanom powědał.

Hdyž sy před štyrceći lětami do redakcije Noweje Doby zastupił,běše ći tehdom hižo jasne, budźeš so cyłe powołanske žiwjenje serbskemu nowinarstwu wěnować?

To wězo nic. Běch do studija žurnalistiki w Lipsku w redakciji Noweje doby wolontariat zabsolwował. Redakcija měješe spočatk 1980tych lět hižo chětro staru wobsadku. Budyšin a jeho wokolina pak stej přewšo powabnej – tuž bě jasne, zo tam póńdu, hdźež mje najebać wšitke moje rěčne njedostatki trjebachu. Najwjetše wužadanje bě, so do hornjoserbšćiny zanurić, wšako mějach w tutej rěči pisać.

Sy sej hižo jako młodostny přał, zo budźeš žurnalist, abo sy tež wo druhich opcijach za swój powołanski puć přemyslował?