Naćisk noweho programa Domowiny: Serbšćina najdrohotniše kubło

Budyšin (SN/mb). Přihoty na přichodnu hłownu zhromadźiznu Domowiny su zahajene: Wčera je list předsydy Dawida Statnika županam a předsydam nadregionalnych towarstwow dóšoł, w kotrymž w mjenje zarjada wo přidźěło prosy. Z tym nawjazuje na wobzamknjenje zwjazkoweho předsydstwa, kotrež je njedawno přichodnu hłownu a wólbnu zhromadźiznu na sobotu, 5. apryla, w 9 hodź., do Serbskeho ludoweho ansambla w Budyšinje zwołało.

Do domjacych nadawkow sobustawskich cyłkow narodneje organizacije słuša hač do 30. nowembra zdźělenka wo zestawje a ličbje čłonstwa. To je wažne, zo bychu w Domowinskim zarjedźe sčasom wědźeli, kelko delegatow kóžda župa a kóžde towarstwo na hłownu zhromadźiznu pósćele. Po delegatnym kluču na započanych 85 čłonow jednoho zastupjerja, přiwšěm pak znajmjeńša dweju.

Samsny termin – 30. nowember – płaći za zapodaće rozprawy wo dźěławosći w lětomaj 2023/2024 a za prěnje namjety za dźěłowe směrnicy Domowiny doby 2025 hač do 2027. Tule dźe wo konkretne nadawki, kiž dyrbjeli so zrealizować.