Hotuja so na 150. jubilejnu schadźowanku w Budyskej Krónje

Budyšin (SN/VaŽ). 150 lět schadźowanka – to je přičina swjećić! Jubilej, kotryž chcedźa organizatorojo zarjadowanja cyle njewšědnje hódnoćić, so dale a bóle bliži. Lětsa chcedźa zarjadowanju wosebitu notu dać, zo bychu dołhej tradiciji schadźowanki čerstwy charakter spožčili. Centralna naležnosć režiserow Katki Pöpelec a Symana Hejduški je, wobdźělnikow pozbudźić, pak sej zwoblěkać tradicionalnu serbsku drastu abo swójsku kreaciju, kotraž na elementy serbskeje kultury nawjazuje. Režiseraj mataj zarjadowanje za idealnu składnosć, kreatiwitu a tradiciju mjez sobu zwjazać, z tym zo so drasta zwoblěka, kotraž serbsku identitu wotbłyšćuje.