Apel za elektrifikaciju železnicy z Drježdźan do Zhorjelca

Budyšin (SN/MiP). „Tele zarjadowanje běše woprawdźe logistiske wužadanje za nas. Koło w tutej zestawje je dotal jónkrótne“, praji nowinski rěčnik Budyskeho měšćanskeho zarjada Peter Stange tróšku wolóženy, po tym zo běše moderator wčerawšu Regionalnu konferencu Hornja Łužica oficialnje zakónčił. To njezadźiwa, wšako běchu nimo krajneju radow wokrjesow Zhorjelc a Budyšin tež wyši měšćanosća městow Wojerecy, Zhorjelc Budyšin a Drježdźany kaž tež zastupjerjo wšitkich gmejnow wobeju wokrjesow přeprošeni. Přišli pak běchu nimo toho reprezentanća hospodarstwa a slědźerskich institucijow w regionje, mjez druhim prof. dr. Günther Hasinger, direktor Astrocentruma Łužica (DZA), a prof. dr. Manfred Curbach, nawoda twarskeho slědźenskeho centruma LAB. Posedźenska žurla w Budyskim krajnym zarjedźe běše kopaće połna.