Nowolětny koncert z „prawdźepodobnje prapremjernym“ programom

Radwor (SN/bn). Chór Meja je z Nowolětnym koncertom swjedźenske lěto składnostnje 130. róčnicy załoženja ćělesa zahajił. Na wupředatej žurli Radworskeho hosćenca „Meja“ předstajichu spěwarki a spěwarjo předwčerawšim program „Pilnje dźěłaj – wjes’le spěwaj“, kotryž bě bywši nawoda chóra Jurij Winar w lěće 1955 zestajił. „Dołho smy rozmyslowali, kak chcemy jubilej woswjećić. Bě z přijomnym připadom, zo ja naš wuměłstwowy nawoda Pětr Cyž w serbskim kućiku Budyskeho měšćanskeho muzeja knižku namakał, kotruž bě wěsty Jurk wozjewił – pseudonym to, pod kotrymž je Winar ‚Mały cyklus serbskich spěwow za lajske chóry‘ zdźěłał. Za koho bě zběrku zhotowił a hač bu program hižo raz předstajeny, njezamóžachmy wuslědźić“, powita Lydija Młynkowa hosći, připowědźiwši w tym zwisku „prawdźepodobnje prapremjeru“.