Wirtuozny a čućiwy jubilejny „Wosebity koncert spočatk lěta“

Hižo tři lětdźesatki wuhotuje pianistka Heidemarja Wiesnerec rjad „Wosebity koncert na spočatku lěta“. Program lětušich cyłkownje sydom zarjadowanjow mjez druhim na žurli Budyskeho Serbskeho muzeja pod hesłom „Music of One“ je cyle na jubilej wusměriła a dźesać prapremjerow do njeho zapřijała. Jako prěnju z nich zahra wona zhromadnje z cellistom Ramónom Jaff´ejom nowotwórbu „Motorik Automat Mechanik“, kotruž bě komponist Deniz Dortok swojej bywšej wučerce Wiesnerec a docentej Johnej McNabbej wěnował. Moderna twórba z razom improwizacije wotbłyšćuje, štož titul lubi a skići hudźbnikomaj składnosć, nanajwyše a nanajhłubše frekwency swojeju instrumentow wudodnić, a to zdźěla samo runočasnje. Jasny kontrast tworješe po tym prěni raz předstajene trijo za smyčkarjow „Alle sollen eins sein“ Feliksa Brojera, kotrež bě na słowa z ewangelija po Janje spisał a kotraž spožča hesle koncerta mjeno.