Hornjołužiska premjera lětušeho ptačeho kwasa w Radworju wuspěšna
Radwor (SN/MkWj). Pisany, lóštny a zabawjacy – takle a podobnje posudźowachu wopytowarjo lětuši ptačokwasny program Serbskeho ludoweho ansambla „Lubosć na žołmach“ předwčerawšim wječor w Radworju, hdźež wón swoju hornjoserbsku premjeru dožiwi. Prěni króć běchu ansamblowcy nowu inscenaciju sobotu tydźenja w Choćebuzu předstajili.
Radworska wjacezaměrowa hala „Slavia“ skići za naročne předstajenja Budyskich ansamblowcow dobre wuměnjenja a dosć městna. Najebać dołhe rynki blidow dyrbjachu zamołwići stólcy přistajić, telko kaž hišće nihdy, zamołwići ansambla twjerdźa. Cyłkownje 200 ludźi bě na program přichwatało.
Zajimawe zdobom je, zo je ptači kwas Budyskeho SLA mjeztym kruty termin mnohim ludźom tež zwonka Radworja. Tak běchu sej wobydlerjo ze Zdźěrje wulke blido rezerwowali, runje tak kaž Chwačenjo z fararjom Wilfriedom Nowakom, kotryž je Radworjej jara swěrny.
