Awtor dźensa

Tereza Wićazowa

Piwko abo škleńčku sekta sej tón abo tamny hdys a hdys po sportowanju, treningu abo wubědźowanju popřewa. Zawěsće a wosebje tež nětko w tak mjenowanym pjatym počasu. Tola alkohol a sport njejstej ze sportoweho wida dobra kombinacija.

Sportowanje čini fit a k tomu přinošuje, zo čłowjek někotre kila wotbudźe. Wosebje hdyž so prawidłownje pohibuje a na strowe zežiwjenje dźiwa. K tomu słuša tež, zo so njestrowych napojow wzdawa. Pšeńčne piwo po treningu je na přikład hižo šwarna kalorijowa bomba. Jedyn gram čisteho alkohola ma sydom kalorijow, wulka škleńca piwa potajkim hižo 200 kalorijow. Zo bychu so tute zaso wotdźěłali, je poł hodźiny běhanskeho treninga trěbne. Pola tutych kalorijow jedna so nimo toho wo „prózdne“ kalorije, dokelž našemu ćěłu ani witaminy, ani mineralne maćizny abo mikroelementy njedadźa. K tomu hišće přińdźe, zo alkohol spalenje tuka redukuje. Mjeztym zo měło ćěło po sporće tukowe bańki wottwarjeć, wottwarja wone potajkim alkohola dla mjenje ćělneho tuka a składuje tuž wjace tuka w tukowych bańkach.