Lětuša serbska debata so štwórtk w 19 hodź. w Budyskim Serbskim domje z temu „Noworěčnicy: Wutrobnje witani?! 100 000 Serbow a kak dale?“ zahaji. Z moderatorkomaj dr. Lubinu Malinkowej a dr. Theresu Jacobsowej je so Marcel Brauman rozmołwjał.

Zestawa ludźi na podiju slubi wšelaki wid na temu: Koho stej přeprosyłoj?

Dr. Lubina Malinkowa: Wažne namaj je, wid noworěčnikow zapřijeć. Wjeselimoj so tuž, na podij Annu-Rosinu Wjeselinu witać. Ju někotryžkuli z filma „Pola nas rěka wona Hanka“ wot Grit Lemke znaje. Tež Budyska fararka dr. Cornelia von Ruthendorf-Przewoski hižo něšto lět serbsce wuknje. Tuchwilu wuwučuje na Serbskim gymnaziju nabožinu a jeje dźěći chodźa do serbskich šulow. Chcemoj so jeju prašeć, što k wuknjenju serbšćiny wabi a při tym pomha. Zdobom chcemoj zhonić, z kotrymi ćežemi so bědźitej.