Katolska cyrkej zhubja dźeń a wjace wěriwych, nic jenož wustupow, ale tež přestarjenja wosadow dla. Biskopstwa w Němskej wozjewja tele dny swoje statiske daty za lěto 2024.

Drježdźany/Zhorjelc/Bonn (SN/MG). Hdyž wozjewja katolska cyrkej swoje statistiki, potom je to stajnje dobra składnosć so raz intensiwnišo z tym zaběrać. Zašły štwórtk běše tež Drježdźansko-Mišnjanska dieceza zjawnosći najnowše ličby spřistupniła. Z nich wuchadźa, zo su serbske wosady w zašłym lěće dohromady 224 wěriwych zhubili. Z nich je 92 ludźi aktiwnje wustupiło. Tole je hladajo na trend w cyłym biskopstwje skerje změrowaca ličba. Tak maja wosady w Ralbicach, Njebjelčicach, Chrósćicach, Radworju, Baćonju, Wotrowje a Budyšinje dohromady něhdźe 12 000 wěriwych.