Za dobrej tydźenjej su jutry. Předewšěm dźěći snano zdychuja, zo dyrbja hišće tak dołho bjez słódkosćow wutrać, su-li sej to za póstny čas předewzali. Wosebje ­křižerjam pak najskerje dawno hižo we hłowje chodźi, što maja hišće wobstarać. Wšojedne hač jenož maličkosće abo ­wjetše nakupy, lěpje je, zo wšitko trěbne sčasom wobstaraš a to na poslednje dny njewotstorčiš.

Štóž hižo wjele lět sobu jěcha, tón wě, što ma so doma a w konjencu činić. ­Hinak je to zawěsće tam, hdźež maja ­nowačka-křižerja. W tajkim padźe su přidatna suknja, dalši cylinder, krawata abo mucha, rukajcy, škórnje atd. trěbne. To a tamne drje móžeš sej w přiwuznistwje a mjez znatymi abo susodami wupožčić. Ale tež nowe sekle, šabraka, cholowy a wjele dalšeho njeje problem, chceš-li sej to hnydom sam kupić. Za tajke pady maš wobchody, hdźež će nazhonići krawcojo, šwalče, konjacy fachowcy a dalši předawarjo poradźuja a ći tak rozsud nastupajo barbu a formu wolóžeja.