Bjesadujo z nawodnicu serbskeho studija rbb w Choćebuzu, z Marion Stenselowej, njezačuwaš, zo so wona tele dny na wuměnk poda. Poprawom wšak je hižo kónc zašłeho lěta dźěłać přestać chcyła, jako bě zwěsćiła, zo je 45 lět dźěłała. Tola na próstwu direkcije rbb bě zrěčenje hišće wo štyri měsacy podlěšiła. Choćebuske studijo rbb ma wot lětušeho nowu nawodnicu, a jej je Marion Stenselowa jako nawodnica serbskeho studija hač dotal poboku była. „Sym hižo w dźěćatstwje nawuknyła, ­zo maš wěc, kotruž započinaš, tež porjadnje zakónčić. Hdyž sym za něšto zamołwitosć přewzała, to chutnje bjeru. To njeje stajnje lochko było, wšako běchu tež ćežke časy.“ Hesło to, kotrež rodźenu Wjerbnjanku, kotraž bě jako najstarša ze sotromaj a bratromaj přewažnje pola maćerje wotrostła, cyłe žiwjenje přewodźa.